د پوهاند سیدالف شاه غضنفر روغتيايي علومو انسټيټيوټ د انستېزي پروګرام څخه ۳۰ تنه فارغ شول
په همدې موخه جوړه شوې ناسته کې د پوهاند غضنفر روغتيايي علومو انسټيټيوټ رئيس، ډاکټر محمد قاسم عادل، د وزير محمد اکبرخان روغتون رئيس ډاکټر شيرعلي شاکر، د انسټيټيوټ استادانو او يو شمېر نورو مسؤلينو ګډون کړی و.
په یاده ناسته کې د غضنفر روغتيايي علومو انسټيټيوټ رئیس، ډاکټر محمد قاسم عادل فارغانو ته د فراغت مبارکي ورکړه او له هغوی څخه يې وغوښتل، چې د طبابت اخلاق په عمل کې پلي کړي او خپلې دندې په اخلاص، امانتدارۍ او د مسؤوليت له احساس سره سمې ترسره کړي.
همدارنګه، د انسټيټيوټ علمي مرستیال ډاکټر عبدالستار جبارزي فارغانو ته د فراغت مبارکۍ ترڅنګ د هغوی د کورنيو، استادانو او عامې روغتيا وزارت د رهبرۍ هڅې وستایلې او ویې ويل: «هېله لرم چې بريالي شئ او د متعهدو کسانو په توګه د ټولنې لپاره د خدمت وړ وګرځئ.
د ناستې په پای کې د انستېزۍ د نولسمې دورې فارغانو ته د مسؤلینو او استادانو له لوري د فراغت تصديق پاڼې ووېشل شوې.
