د Tertiary Complementary -HMIR په نوم د ثالثي روغتیایي خدمتونو د معلوماتو راټولولو لپاره د ظرفیت لوړونې دوهم پړاو ورکشاپ ترسره شو
د (Tertiary Complementary -HMIR) په نوم د ثالثي روغتیایي خدمتونو د ارقامو راټولولو لپاره د نویو فورمو او میکانیزم د پېژندنې او تطبیق په موخه د کابل ښار شیخ زاهد، رابعه بلخي، وزیر محمد اکبرخان، استقلال، د رواني روغتیا، میوند، خیرخانې ۱۰۲ بستریز، اتاترک او نور ملي او تخصصي روغتونونو مسؤلینو ته د ظرفیت لوړونې دوهم پړاو درې ورځنی ورکشاپ ترسره شو.
د عامې روغتیا وزارت د څارنې او پلټنې لوی رئیس، ډاکټر عنایت الله عنایت د یاد ورکشاپ پرانیسته کې د TC _ HMIR فورمو د اهمیت، د وزارت د ستراتیژیکو لومړیتوبونو پر بنسټ د دقیقو معلوماتو د راټولولو پر اړتیا او د روغتیایي سیسټم د شفاف مدیریت او شواهدو پر بنسټ د پرېکړو د ارزښت په اړه هر اړخیزه وینا ترسره کړه.
نوموړي وویل، چې د تحلیل او ارزونې ریاست د روغتیایي معلوماتو آمریت، د (HMIS) تخنیکي همکارانو په مرسته د تخصصي روغتیایي خدمتونو د دقیقو معلوماتو د راټولولو لپاره نوی میکانیزم او فورمې تطبیقوي، چې له مخې به یې راټول شوي ارقام د DHIS2 ملي سیسټم ته انتقالېږي او په دې توګه به پالیسي جوړوونکي، پرېکړه نیوونکي، څېړونکي او نور کاري شریکان وکولای شي، خپلې پرېکړې پر دقیقو او شفافو معلوماتو وکړي.
