په جنګلک روغتون کې د نشهيي توکو پر وړاندې د ځوانانو د پوهاوي غونډه ترسره شوه
د جنګلک روږدو درملنې ۴۵۰ بستریز روغتون د نشه يي توکو څخه د مخنیوي ټیم له لوري د کابل د طبي علومو پوهنتون د مسؤلینو، استادانو او زده کړيالانو په شتون کې د عامه پوهاوي غونډه تر سره شوه
د دې غونډې اساسي موخه د ځوانانو، په ځانګړې توګه د روغتيايي څانګو زده کړيالانو د پوهاوي کچې لوړول وو، تر څو هغوی د نشه يي توکو له خطرونو او ناوړه پایلو څخه خبر او د دې زیانمنې پدیدې د خپرېدو د مخنیوي لپاره اغېزمنې لارې چارې ولټول شي.
په دې غونډه کې د جنګلک ۴۵۰ بستریز روغتون مسؤل، ډاکټر عبدالقادر دانشمل د نشه يي توکو د منفي اغېزو په اړه وينا تر سره او د علمي او طبي معلوماتو په وړاندې کولو سره یې د نشه يي توکو د تخریبي اغېزو په اړه، چې پر عصبي، قلبي او رواني سیستمونو اغېز کوي، هم خبرې وکړې.
نوموړي ټینګار وکړ، چې اعتیاد یوازې یو فردي ستونزه نه ده، بلکې یوه جدي ټولنیزه او روغتيايي ستونزه ده چې کورنۍ او ټولنه هم اغېزمنوي.
د یادونې وړ ده، چې دا ډول غونډې کولای شي، د نشه يي توکو پر لور د ځوانانو د لېوالتيا په کمولو او د یوې سالمې او باخبره ټولنې په رامنځته کولو کې مهم رول ولوبوي.
