د پوهاند سید الف شاه غضنفر روغتیایي علومو انسټېټیوټ راډیولوژي څانګې څخه ۱۴ تنه زده کړیالان فارغ شول
په همدې موخه جوړو شویو مراسمو کې د پوهاند غضنفر روغتیایي علومو انسټېټیوټ رئیس، دوکتور محمدقاسم عادل، د یاد انسټېټیوټ آمرینو، د ډیپارټمنټونو مسؤلینو او استادانو ګډون کړی و.
د غضنفر روغتیایي علوموانسټېټیوټ رئیس، دوکتور محمد قاسم عادل فارغو شویو زده کړیالانو ته د فراغت مبارکې وویله او له هفوی څخه یې وغوښتل، چې د طبابت اخلاق په عملي ډول پلي کړي او خپلې دندې په پوره اخلاص، امانتدارۍ او د مسؤلیت له احساس سره سمې ترسره کړې.
نوموړي په روغتیايي برخه کې د فارغو شویو زده کړیالانو رول مهم وګاڼه او ټینګار یې وکړ، چې د روغتیایي سیستم په ښه والي او پیاوړتیا کې خپل رول په پوره صداقت او اخلاص اداء کړې.
دغه راز، په دې مراسمو کې د راډیولوژي څانګې د ۴۵ مې دورې فارغانو ته د مسؤلینو او استادانو له لوري د فراغت تصدیق پاڼې وویشل شوې.
د یادونې وړ ده، چې د پوهاند غضنفر روغتیایي علومو انسټېټیوټ د مرکز سربېره په ۱۶ ولایتونو کې هم څانګې لري، چې په دولسو بېلابېلو روغتیایي برخو کې وړ او مسلکي کسان روزي او ټولنې ته یې د خدمت په موخه وړاندې کوي.
