د عامې روغتیا وزارت د پراختیايي پروژو لا زیاتې همغږۍ په موخه ناسته ترسره شوه
دا ناسته چې د پلان او پالیسۍ لوی ریاست له لوري ترسره شوه، په کې د عامې روغتیا وزیر ښاغلي مولوي نور جلال جلالي، د روغتیايي پراختیا او پالیسۍ مرستیال ښاغلي ډاکټر محمد حسن غیاثي، د وزارت مرکزي رئیسانو، د مقام د دفتر مشاورینو او د عامې روغتیا وزارت د پراختیايي پروژو مسؤلینو ګډون کړی و.
د عامې روغتیا وزیر، ښاغلي مولوي نور جلال جلالي وویل: "موږ ټول د یو کور خادمان یو، چې هغه افغانستان دی او د دې هېواد ټول اوسېدونکي حق لري، چې روغتیايي خدمات ورته وړاندې شي او دا زموږ د ټولو مسؤلیت دی چې دوی ته باکیفیته روغتیايي خدمتونه وړاندې کړو".
د عامې روغتیا وزیر، دا مسؤلیت یوه ازموینه وبلله او زیاته یې کړه، چې په دې کې هر ډول تېروتنه او غفلت د خلکو په حق کې ظلم دی.
ښاغلي وزیر همداراز، د عامې روغتیا وزارت د پراختیایي پروژو ټولو مسؤلینو ته لارښوونه وکړه، چې خپل ورسپارل شوي مسؤلیتونه په سمه توګه ترسره او د ۱۴۰۴ مالي کال لپاره د خپلو ادارو اړتیاوې په دقیق ډول تنظیم او وارزوي او ژر تر ژره یې د تدارکاتو ریاست ته واستوي؛ تر څو په اړه یې لازم اقدامات ترسره شي.
بل لور، د پراختیایي پروژو مسؤلینو د خپلو وړاندیزونو او نظرونو ترڅنګ ژمنه وکړه، چې په دې برخه کې به د عامې روغتیا وزارت سره بشپړه همکاري کوي.
