د مرکز او ولایتونو ۴۰ تنو نرسانو او ډاکټرانو د جدي پاملرنو (ICU) څانګې کلینیکي برخو مدیریت کې لس ورځنی زده کړې ترلاسه کړې
په همدې موخه جوړو شویو مراسمو کې د عامې روغتیا وزارت مالي او اداري چارو مرستیال ښاغلي ملا بخت الرحمن شرافت، د ظرفیت لوړولو ریاست مسؤلینو، د روغتیا نړیوال سازمان استازو او روغتیا پالانو ګډون کړی و.
د مالي او اداري چارو مرستیال ګډونوالو ته هر اړخیزه وینا ترسره او د سیمنار ګډونوالو ته یې سپارښتنه وکړه، چې زده کړي موضوعات دې په روغتونونو کې پلي کړي؛ ترڅو په سمه توګه د بېړنیو ناروغانو روغتیايي ستونزو ته رسېدنه ترسره او غوره درملنه یې وشي.
یاد روزنیز ټریننګ چې د عامې روغتیا وزارت ظرفیت لوړولو ریاست له لوري د روغتیا نړیوال سازمان په تخنیکي همکارۍ د اندراګاندي ماشومانو درملنې روغتون تالار کې ترسره شو، ګډونوالو په کې د مجربو استادانو له لوري د جدي پاملرنو (ICU) څانګې کلینیکي برخو مدیریت کې لس ورځنی عملي او نظري زده ترلاسه کړې.
