د کتلوی معافیت ودانۍ د یو لړ مراسمو په ترڅ کې پرانیستل شوه
د افغانستان اسلامي امارت د عامې روغتیا وزارت له لوري په مرکز کابل کې د دوه میلیونه ډالرو په لګښت د کتلوي معافیت ودانۍ جوړه او د یو لړ مراسمو په ترڅ کې ګټې اخیستنې ته وسپارل شوه.
په همدې موخه جوړو شویو مراسمو کې د عامې روغتیا وزیر، ښاغلي مولوي نور جلال جلالي، د روغتیايي خدمتونو وړاندې کولو مرستیال، ښاغلي مولوي عبدالولي حقاني، د وزارت مرکزي رئیسانو، د روغتیا په برخه کې د همکارو مؤسسو استازو او روغتیا پالانو شتون درلود.
د عامې روغتیا وزیر، ښاغلي مولوي نور جلال جلالي د یادې ودانۍ په پرانیستې خوښي څرګنده کړه او ویې وویل، په دې وروستیو کې د عامې روغتیا وزارت له لوري د واکسینو خدمات لا ښه شوي او یادو خدماتو ته د ولسونو لاس رسی زیات شوی، چې له امله یې د ماشومانو په مړینه کې هم د پخوا په پرتله د پام وړ کموالی راغلی.
ښاغلي وزیر زیاته کړه، د عامې روغتیا وزارت په پلان کې لري، چې د واکسین خدماتو سربېره د ولسوالیو سطحې روغتونونو جوړېدو، د BPHS او EPHS خدماتو ته له سره کتنې، روغتیايي پرسونل د ظرفیت لوړولو او په بېلا بېلو روغتیايي برخو کې د متخصصینو د روزلو پر مټ روغتیايي خدمات لا پراخه کړي؛ څو د هېواد ټول وګړي وکولای شي په اسانۍ سره روغتیايي خدماتو ته لاس رسی پیدا او غوره درملنه یې وشي.
د یادې غونډې په دوام د روغتیايي خدمتونو وړاندې کولو مرستیال، ښاغلي مولوي عبدالولي حقاني هم د یادې ودانۍ پر پرانیستې، چې د یونیسیف او ګاوي په مالي همکارۍ په پنځه پوړیز ډول د دوه میلیونه ډالرو په لګښت جوړه شوې او پر ټولو اړینو او مجهزو روغتیايي تجهیزاتو سمبال، چې په روغتیايي برخه کې به ګڼې اسانتیاوې رامنځته کړي خوښي څرګنده کړه.
بل لور د یونیسیف استازي وویل، د یاد تعمیر سربېره یې په ننګرهار او په پکتیا ولایتونو کې ورته ودانۍ جوړې کړي او اوسمهال هم په څلور نورو ولایتونو کې د کتلوي معافیت ودانیو د جوړېدو چارې روانې دي، چې له جوړېدو وروسته به ګتې اخیستنې ته وسپارل شي.
