د NIC لابراتوار یو ځل بیا په نړیوال کیفیت کنټرول کې لوړه درجه ترلاسه کړه
د عامې روغتیا وزارت د مرکزي لابراتوارونو (NIC) څانګې یو ځل بیا په بهرني کيفيت کنټرول (EQAP) کې لوړه درجه ترلاسه او د روغتیا نړیوال سازمان د ختیځې مدیترانې حوزې (WHO EMRO) هېوادونو کې د افغانستان نوم روښانه کړ
دا ستره لاسته راوړنه د عامې روغتیا وزارت د تشخیصیه خدمتونو ریاست اړوند د مرکزي لابراتوارونو د مایکروبیولوژۍ عمومي مدیریت تر چتر لاندې د انفلونزا ملي لابراتوار (NIC) د مسلکي او ژمن ټیم او د هغوی د همکارانو د نه ستړې کېدونکو هڅو، تخنیکي وړتیاوو او دوامدارو هلو ځلو روښانه پایله ده، چې د EQAP پروسې کې یې لوړه درجه ترلاسه او د روغتیا نړیوالو قوانینو ته یې د هېواد ژمنتیا ثابته کړه.
دغه لړۍ له ۲۰۰۹م کال راهیسې په پرله پسې ډول روانه ده، چې د یاد ټیم د لوړ کیفیت، دقیقو لابراتواري تشخیصونو او نړیوالو معیارونو ته د ژمنتیا څرګندونه کوي.
