د مالي او اداري چارو مرستیال د مرکزي روغتونونو له رئیسانو سره د تدارکاتي پلانونو په اړه ناسته تر سره کړه
د عامې روغتیا وزارت د مالي او اداري چارو مرستیال، ښاغلي مولوي محمد اسحق صاحبزارده په مرکز کابل کې د تخصصي او ثالثي روغتونونو له رئیسانو سره د روغتونونو لپاره تدارکاتي پلانونو جوړېدو، په اغېزمنه توګه د بودیجې د مصرف، روغتونونو لپاره د درملو او طبي توکو پېرلو، د اداري برخې کارونو د چټکتیا او په معیاري توګه د روغتیايي خدمتونو وړاندې کېدو په موخه ناسته ترسره کړه.
په دې ناسته کې د مالي او اداري چارو مرستیال په اغېزمنه توګه د بودیجې مصرف ته په ټینګار وویل، ټول روغتونونه باید د روان کال په ترڅ کې د وزارت اړوند منظور شوې بودیجې پر اساس خپل تدارکاتي پلانونه جوړ کړي.
د مالي او اداري چارو مرستیال همداراز زیاته کړه د درملو او طبي توکو د پېرلو په برخه کې باید له مشهورو شرکتونو سره قرارداد وشي؛ ترڅو په اغېزمنه توګه د ناروغو هېوادوالو درملنه وشي.
سربېره پر دې نوموړي د روغتونونو له مسؤلینو وغوښتل، چې په صادقانه توګه د ټولو ناروغو هېوادوالو روغتیايي ستونزو ته رسېدنه ترسره او هغوی ته غوره روغتیايي خدمات وړاندې کړي.
