د ا.ا.ا د عامې روغتیا وزیر، ښاغلي مولوي نور جلال جلالي هند هېواد ته د خپل رسمي سفر په ترڅ کې د یاد هېواد د درملو پراختیایي ادارې (PharmEXCIL) له مسؤلینو سره ناسته ترسره کړه

په دې ناسته کې د درملو، طبي محصولاتو او روغتیایي تجهیزاتو په برخه کې د همکاریو او دوه اخیزو اړیکو پر پراختیا خبرې وشوې او دواړو لوریو د درمل جوړونې د ظرفیت پیاوړتیا، ارزانه او باکیفیته درملو ته د لاسرسي پر اهمیت ټینګار وکړ.

د عامې روغتیا وزیر، ښاغلي مولوي نور جلال جلالي د افغانستان روغیتایي سکتور سره PharmEXCIL ادارې همکاري اړینه وبلله او د اغېزمې همکارۍ پر پیاوړتیا یې ټینګار وکړ، نوموړي وویل، عامې روغتیا وزارت هڅه کوي، چې د هېواد روغتیايي سیستم پیاوړی او خلکو ته د معیاري روغتیايي خدمتونه وړاندې کولو زمینه برابره کړي.

دغه راز، ښاغلي وزیر زیاته کړه، له افغانستان سره د PharmEXCIL ادارې همکاري د روغتیايي سکتور د پیاوړتیا، د درملو خوندیتوب، د کیفیت تضمین او د دوامدارو روغتیايي خدمتونو د پراختیا لپاره مهم او ستراتېژیک ارزښت لري.

بل لور د هند هېواد د درملو پراختیایي ادارې مسؤلینو وویل، د PharmEXCIL د فعالیت ساحه پراخه ده، چې پکې بشپړ درملیز ترکیبات، فعاله درملیز مواد (APIs)، واکسینونه، بیولوژیکي محصولات، طبي وسایل، تشخیصيه تجهیزات، بوټیز او دودیز درمل، قراردادي تولید او د څېړنې او پراختیا (R&D) خدمتونه شامل دي.

ورته مهال په یاده ناسته کې د PharmEXCIL ادارې د فعالیتونو، مسؤلیتونو او د همکارۍ د پراخو فرصتونو په اړه هر اخیز معلومات وړاندې شول؛ یاده اداره د هند هېواد د سوداګرۍ او صنعت وزارت تر چتر لاندې یو رسمي او دولتي بنسټ دی، چې د هندي درملو، طبي محصولاتو او روغتیایي تجهیزاتو د نړیوالو صادراتو د تنظیم، پراختیا او همغږۍ مسؤولیت پر غاړه لري.

د یادونې وړ ده، چې په یاده ناسته کې د PharmEXCIL ادارې له لوري افغانستان سره د موسمي ناروغیو درملنې په موخه د شاوخوا سل زره پیچکاریو مرسته هم وشوه.