د ا.ا.ا د عامې روغتیا وزیر، ښاغلي مولوي نور جلال جلالي د ۲۰۲۶ز کال لپاره د پولیو (ګوزڼ) واکسین د لومړي ملي کمپاین پرانیسته کې ګډون وکړ

دغه کمپاین د نړیوالو ادارو په ملاتړ د روان مېلادي کال د اپرېل له ۱۳مې تر ۱۶مې نېټې پورې د دریو ورځو لپاره د هېواد په ټولو حوزو کې پلی کېږي، چې په ترڅ کې به یې شاوخوا (۱۲،۶) میلیونه له پنځو کلونو کم عمر لرونکو ماشومانو ته واکسین تطبیق شي. دا کمپاین په دایکندي او بامیان ولایتونو کې د سړې هوا له امله ځنډېدلی او په غور ولایت کې به یوه اوونۍ وروسته ترسره شي.

د عامې روغتیا وزیر، مولوي نور جلال جلالي وویل: (د عامې روغتیا وزارت له خپلو همکارانو سره په ګډه ژمن دی چې په افغانستان کې د پولیو ویروس مخه ونیسي، موږ به خپلې ټولې هڅې وکړو او د پولیو واکسین کمپاینونو او نورو اړینو روغتیايي خدماتو ته به تر هغې دوام ورکړو، څو پولیو ناروغي په بشپړه توګه له افغانستانه له منځه یوسو).

ښاغلي وزیر زیاته کړه، دا ډېره مهمه ده چې د ټولنې ټول اغېزناک کسان، لکه دیني عالمان، قومي مشران او والدین په ټول هېواد کې د پولیو واکسین له ټیمونو ملاتړ وکړي، موږ له ټولو هېوادوالو په درناوي غوښتنه کوو، چې د پولیو پر وړاندې مبارزه کې خپله فعاله ونډه واخلي او د افغانستان د ماشومانو ژوند او روغتیا خوندي کړي).

د یادونې وړ ده، چې د دغه کمپاین په ترڅ کې به له ۶ تر ۵۹ میاشتو عمر لرونکو ماشومانو ته ویټامین ای (A) هم ورکړل شي، چې د هغوی د سترګو، پوستکي او معافیت سیستم په روغ ساتلو کې مرسته کوي.