د عامې روغتیا نوماند وزیر د روغتیا نړیوال سازمان په ۶۷ ناسته کې ګډون وکړ
د افغانستان د اسلامي جمهوریت د عامې روغتیا نوماند وزیر ډاکټر احمد جواد عثماني د روغتیا نړیوال سازمان په 67 مه سیمه ییزه ناسته کې چې په آنلاین ډول جوړه شوې وه ګډون وکړ.
په دې ناسته کې، د سیمې او نړۍ اوسني روغتیایي حالت باندې د روغتیایي مسؤلینو ترمنځ بحث او د نظرونو تبادله وشوه.
ډاکټر احمد جواد عثماني په افغانستان کې د روغتیایي وضعیت ښه کولو، په ځانګړي توګه د روغتونونو اصلاحات، د کورونا ویروس دوهمې څپې لپاره چمتووالی، د اساسي او روغتوني روغتیایي خدمتونو چمتو کولو باندې ټینګار وکړ او د روغتیا نړیوال سازمان او نورو نړیوالو شرکاوؤ څخه په دې برخه کې د لا ډېرو همکاریو غوښتنه وکړه.
په دغه غونډه کې د روغتیا نړیوال سازمان عمومي رئیس ډاکټر تریدوس، ډاکټر المنداري د سیمه ییز (ایمرو) سازمان رئیس او د ۲۲ هېوادونو روغتیا وزیرانو برخه اخیستې وه.
