د روغتیایي خدمتونو وړاندې کولو معین د افغانستان د مرستې او پراختیا د همغږي کونکي سازمان د کار پوه هانو په غونډه کې ګډون وکړ
د عامې روغتیا وزارت د روغتیايي خدمتونو وړاندې کولو معین ډاکټر وحید مجروح، نن د "افغانستان د مرستې او پراختیا متخصصینو" سازمان په غونډه کې چې د ولسمشر د لومړي مرستیال په مشرۍ جوړه شوې وه ګډون وکړ.
په دې غونډه کې، د ولسمشر لومړي مرستیال جلالتمآب امرالله صالح د "ډیاسپورا" یا له وطن څخه لرې ټولنو د ریاست جوړولو، د سولې پروسې د پرمخ بېولو، اقتصادي پراختیا او روغتیا سکتور د پرمختګ لپاره د حکومت د هڅو په اړه خبرې وکړې.
د ولسمشر لومړي مرستیال ټینګار وکړ چې د ډیاسپورا قشر له تجربې او تخصص څخه باید د اصلاحاتو، د همه شموله سولې د پروسې پرمخ بېولو کې د افغانستان اسلامي جمهوري دولت سره همغږي او د افغانستان د روغتیا سکتور د پراختیا برخه کې مؤثره ګټه واخیستل شي، هغه وویل: چې د ډیاسپورا ریاست پالیسي ډېرې غنامندۍ او کار ته اړتیا لري.
په ورته وخت کې د عامې روغتیا وزارت د روغتیايي خدمتونو وړاندې کولو معین ډاکټر وحید مجروح، د روغتیا په سکتور کې شته فرصتونه او ننګونې تشریح کړې او ویې ویل: چې د افغاني ډیاسپورا ډاکټرانو او روغتیا سکتور ترمینځ همغږي د افغانستان دولت او خلکو اساسي غوښتنه ده.
