د عامې روغتیا وزارت د اجراییوي بورډ غونډه جوړه شوه
په دې ناسته کې د عامې روغتیا سرپرست وزیر ډاکټر وحید مجروح د هېواد په روغتونونو کې د اکسیجن پلنټ نصبولو سیسټم د ١٤٠٠ لمریز کال د بودیجې ارزونه، په دې برخه کې د مالیې وزارت پرېکړو او د روغتونونو د اصلاحاتو د تسلیمۍ اسنادو د پروسې په اړه له ګډونوالو سره خبرې وکړې.
همدارنه د دې غونډې په دوام، د بورډ غړو د یادو موضوعاتو په اړه خپل کاري پرمختګونه د وزارت له رهبري سره شریک کړل او په دې برخه کې د دوی د کاري ننګونو د حلولو لپاره د لارښوونو غوښتونکي شول.
ډاکتر مجروح د بورډ غړو د کاري راپورونو له اورېدو وروسته، تخنیکي کمیټې و ګمارلې ترڅو د شته ننګونو له ارزولو وروسته هغه اجراات چې په پام کې دي په ټاکلي وخت کې ترسره کړي.
سربېره پردې، د عامې روغتیا سرپرست وزیر د لاندې موضوعاتو لکه: د اصلاحاتو د اجنډا پلي کول، د اصلاحاتو د طرحې لنډیز چمتو کول، په ټاکلي وخت د روغتیایي کار کوونکو د معاشونو ورکول، او له پولې بهر متخصصینو د اسنادو د ستونزو د حل په اړه له ګډونوالو سره خبرې وکړې او مسؤلینو ته یې لازمې لارښوونې وکړې.
