د عامې روغتیا سرپرست وزیر د نړیوالو موسسو له استازو سره وکتل
چهارشنبه، ۲۴ وری ۱۴۰۱
د عامې روغتیا سرپرست وزیر ډاکټر قلندر عباد نن د روغتیا د نړیوال سازمان(WHO)، یونیسف (UNICEF) ، UNFPA او د روغتیا په برخه کې د نورو مرستندویه ادارو له استازو سره وکتل.
په دې کتنه کې د عامې روغتیا وزارت او تطبیق کوونکو ادارو ترمنځ د لا زیاتې همغږۍ، حساب ورکونې او شفافیت په اړه خبرې وشوې.
د عامې روغتیا سرپرست وزیر له روغتیايي خدمتونو وړاندې کوونکو سره پر لا زیاتې همغږۍ او حساب ورکونې ټینګار وکړ او له ټولو روغتیايي خدمتونو وړاندې کوونکو یې وغوښتل چې د بودیجې پلانونه، قراردادونه او د قراردادونو تصویب له عامې روغتیا وزارت سره شریک کړي.
ډاکټر عباد په ولايتونو کې د روغتيايي خدمتونو د وړاندې کولو د بنسټونو پر کړنو هم نيوکه وکړه او ويې ويل، چې د دغو بنسټونو ډېرى کړنې موږ ته د منلو وړ نه دي او بايد په دې برخه کې جدي همغږي رامنځته شي.
همدارنګه یې په افغانستان کې له ټولو نړیوالو موسسو څخه چې په افغانستان کې فعالیت کوي د اسلامي امارت په ملاتړ ټینګار وکړ او ویې ویل چې موږ په افغانستان کې ستاسو امنیت تامینولو ته ژمن یو.
له بلې خوا د غونډې برخه والو د افغانستان د سکټور پر ملاتړ ټینګار وکړ او ژمنه یې وکړه چې د همغږۍ د پیاوړتیا او د روغتیايي خدمتونو د وړاندې کولو په برخه کې به ښه والی رامنځته کړي.
