د عامې روغتیا وزارت تخنیکي پلاوي په بنګلادیش کې د درملو شرکتونو سره د همغږۍ ناسته وکړه
د عامې روغتیا وزارت د خوړو او درملو معینیت تخنیکي پلاوي د درملو او روغتیايي محصولاتو د تنظیم لوی رئیس، حافظ ډاکټر نعیمالله ایوبي په مشرۍ بنګلادیش هېواد ته د رسمي سفر په ترڅ کې د دغه هېواد د درملو تولیدي فابریکو او روغتیايي محصولاتو شرکتونو له استازو سره د همغږۍ ناسته ترسره کړه.
په دې ناسته کې د ياد سفر موخو، افغانستان ته د درملو او روغتیايي محصولاتو صادرولو لپاره د نویو اسانتیاوو معرفي کولو، د درملو ثبت بهیر د تشریح او توکو لومړني قیمت لیک (Proforma Invoice) د صادرېدو څرنګوالي په اړه بحث او خبرې تر سره شوې.
همدارنګه، حافظ ډاکټر نعیمالله ایوبي د سوداګرو او واردوونکو لپاره د ویزو صادرېدو بهیر پر چټکتیا ټینګار وکړ او د درملو صنعت برخو کې یې پانګوال وهڅول تر څو افغانستان کې پانګونه وکړي ځکه اوس تر بل هر وخت دلته د پانګونې زمینه برابره ده.
بل لور، د تولیدي شرکتونو استازو هم د همکاريو لپاره خپل چمتووالی څرګند او د باکیفیته محصولاتو وړاندې کولو ژمنه یې وکړه.
د دې ناستې په پای کې د خوړو او درملو تخنیکي پلاوي د ګډونوالو پوښتنې او ستونزې واورېدې او ډاډ یې ورکړ، چې د موجوده ننګونو د حل او د همکاریو بهیر ښه والي لپاره به لازم اقدامات ترسره شي.
