د ا.ا.ا د عامې روغتیا وزارت د روغتیایي خدماتو وړاندې کولو مرستیال ښاغلی مولوي عبدالولي حقاني له لوړ رتبه پلاوي سره په رسمي سفر ترکیې هیواد ته روان شو
په دغه سفر کې چې له ښاغلي مرستیال سره د عامې روغتیا وزارت د مقام د دفتر لوی رئیس شیخ محمد طاهر حلیم ، د نړیوالو اړیکو او مرستو د انسجام رئیس مولوي محمد داود منصوري ، د پلان او پالیسۍ لوی رئیس ډاکټر سید رسول منګل ، د معالجوي طب لوی رئیس ډاکټر وحدت الکوزی او ځینې نور مسؤولین شتون لري ، موخه یې د روغتیا په برخه کې د نویو تجاربو تر لاسه کول ، د ترکیې هیواد له ځینې روغتیایي او علمي مراکزو لیدنه ، د ترکیې هیواد له روغتیایي او دولتي مسؤولینو سره لیدنې ، د اړیکو او همکاریو ایجاد او پراختیا ده.
همدارنګه دا پلاوی به د خپل سفر پر مهال له بېلا بېلو خصوصي او دولتي مسؤولینو سره لیدنې تر سره کړي چې موخه یې د هیواد د روغتیایي سیستم پرمختګ او د ترکیې هیواد سره د روغتیا په برخه کې د لا ښې همغږۍ رامنځ ته کول دي.
