د ا.ا.ا د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني او مل پلاوي قطر هېواد ته د خپل رسمي سفر په ترڅ کې د افغانستان لپاره د فرانسې له شارژدافیر سره روغتیا برخه کې د همکاریو پیاوړتیا په موخه ناسته ترسره کړه
په دې ناسته کې چې د قطر هېواد لپاره د ا.ا.ا سفیر، ښاغلي سهیل شاهین او د سفارت اړوند کارکوونکو هم شتون درلود، د افغانستان د روغتیايي سکتور پر روانو اړتیاوو، لاسته راوړنو او د دوه اخیزو همکاریو پر پیاوړتیا بحث او خبرې ترسره شوې.
د روغتیایي خدمتونو وړاندې کولو مرستیال د فرانسې له حکومت څخه د افغانستان د روغتیايي سکتور د تېرو کلونو ملاتړ له امله مننه وکړه او دغه همکاري او ملاتړ یې ارزښتمن وباله. همدارنګه، ښاغلي مرستیال د افغانستان روغتیايي سکتور لپاره د اوږد مهاله او دوامدار ملاتړ او په ځانګړي ډول د FMIC روغتون په چوکاټ کې د تخنیکي همغږۍ د لا پراختیا غوښتنه وکړه.
ورته مهال، په یاده ناسته کې د افغان ډاکټرانو د ظرفیت لوړولو لپاره د روزنیزو پروګرامونو جوړېدو، مسلکي پرمختګ او افغانستان ته د فرانسوي ډاکټرانو د لېږلو په اړه بحث وشو؛ افغان پلاوي غوښتنه وکړه، چې د FMIC روغتیايي خدمتونه دې د افغان ولس لپاره لا ارزانه او د لاسرسي وړ وګرځول شي.
بل لور، د فرانسې شارژدافیر د افغانستان د روغتیايي سکتور د ملاتړ په اړه د خپل هېواد پر ژمنتیا ټینګار وکړ او ویې ویل، چې فرانسه به د FMIC له لارې خپلو همکاریو ته دوام ورکړي. نوموړي زیاته کړه، چې سږکال د FMIC د بنسټ اېښودنې شلمه کلیزه لمانځل کېږي، چې دا د دواړو هېوادونو ترمنځ د بریالۍ او دوامداره روغتیايي همکارۍ څرګند ثبوت دی.
