د افغانستان اسلامي امارت د عامې روغتیا وزير، ښاغلي ډاکټر قلندر عباد په خپل کاري دفتر کې د افغانستان لپاره د چین له سفیر، ژاو شېنګ سره لیدنه ترسره کړه
په دې لیدنه کې د جمهوریت روغتون د بیا رغونې، د افغان ډاکټرانو د ظرفیت لوړونې، په روغتیايي برخه کې د پانګې اچونې، د کرونا او پولیو ناروغۍ د کنټرول او د دواړو هېوادونو تر منځ په غوره همغږۍ بحث او خبرې ترسره شوې.
د عامې روغتیا وزیر، ښاغلي ډاکټر قلندر عباد د افغانستان او چېن هېواد ترمنځ اړیکې اړینې وبللې او د دواړو هېوادونو ترمنځ د دوه اړخیزو همکاریو غوښتونکی شو.
ښاغلي وزیر همداراز د افغان روغتیايي کارکوونکو د ظرفیت لوړونې تر څنګ د بیارغونې په برخه کې د چین هېواد همکاري اړینه وبلله او زیاته یې کړه، چې موږ په افغانستان کې د روغتیا په برخه کې ډېره زیاته بشري قوه لرو او اړتیا ده د ظرفیت لوړونې لپاره یې کار وشي.
د افغانستان لپاره د چین هېواد سفیر، ژاو شېنګ د دواړو هېوادونو ترمنځ دوه اړخیزه همکاري اړینه وبلله او په روغتیايي برخه کې یې د همکارۍ ډاډ څرګند کړ.
