د اماني لېسې زدهکوونکو ته د نشهیي توکو د مخنیوي په اړه د عامه پوهاوي پروګرام ترسره شو
د عامې روغتیا وزارت د روږدو درملنې ملي برنامې اړوند جنګلک د روږدو درملنې ۴۵۰ بستریز مرکز د نشه یي توکو له استعمال څخه د مخنیوي ټیم له لوري د اماني لېسې زدهکوونکو ته د نشهیي توکو له استعمال څخه د مخنیوي په موخه د عامه پوهاوي پروګرام ترسره شو
په دې پروګرام کې د جنګلک ۴۵۰ بستریز مرکز ټولنیز کارکوونکي، ډاکټر حفیظ حقداد د نشهیي توکو د ناوړه اغېزو او پایلو په اړه هر اړخیز معلومات وړاندې کړل. نوموړي یاده موضوع له روغتیايي، ټولنیزو، فرهنګي او رواني اړخونو وڅېړله او د نشه یي توکو د کارونې له امله یې پر فرد، کورنۍ او ټولنه د رامنځته کېدونکو ناوړه زیانونو اړوند معلومات شریک کړل.
سربېره پر دې، هغه د عامه پوهاوي پر اهمیت، د سالمو ملګرو پر ټاکلو، د دیني او فرهنګي ارزښتونو پر پیاوړتیا او د نشه یي توکو پر مخنیوي هم ټینګار وکړ.
د پروګرام په پای کې زدهکوونکو خپلې پوښتنې مطرح کړې، چې د پروګرام مسؤلینو او وړاندې کوونکو له لوري ورته لازم او قناعت بخښونکي ځوابونه وړاندې شول.
