د روغتیايي خدمتونو وړاندې کولو مرستیال پکتیکا ولایت کې د یوې روغتیایي ځالې پرانیسته تر سره کړه
د عامې روغتیا وزارت د روغتیايي خدمتونو وړاندې کولو مرستیال ښاغلي، مولوي عبدالولي حقاني او ورسره مل پلاوي پکتیکا ولایت د سفر په ترڅ کې د دغه ولایت سروبي ولسوالۍ شهاب الدین سیمه کې د یوې روغتیايي ځالې پرانیسته ترسره کړه.
په همدې موخه جوړو شویو مراسمو کې د عامې روغتیا وزارت د روغتیايي خدمتونو وړاندې کولو مرستیال ښاغلي، مولوي عبدالولي حقاني وویل چې د یادې روغتیايي ځالې جوړېدو په شمول، پکتیکا ولایت کې د پنځه نورو روغتیايي ځالو د جوړیدو چارې هم پای ته ورسیدې.
ښاغلي، مرستیال زیاته کړه چې دغه روغتیايي ځالې د UNFPA په مالي او د AYSO موسسې په تخنیکي همکارۍ چې په هرې یوې ۲۹۵۰۰ امریکایي ډالر لګښت شوی، روغتیايي برخه کې د پکتیکا د خلکو لپاره لویه لاسته راوړنه ده، نوموړي په یادو مراسمو کې د ورته نورو روغتیايي خدمتونو د پراختیا ډاډ هم ورکړ.
د یادونې ده چې په دغه مراسمو کې د پکتیکا عامې روغتیا رییس ډاکټر عبد الله جان حقمل، د سروبي ولسوال قومي مشرانو او ځای اوسیدونکو ګډون کړی و.
