د روغتیايي پراختیا او پالیسۍ مرستیال د کوچني اختر په لومړۍ ورځ په کابل کې دشت برچي ۱۰۰ بستریز او ۵۰ بستریز روغتونونو څخه لیدنه ترسره کړه
د ا.ا.ا د عامې روغتیا وزارت روغتیايي پراختیا او پالیسۍ مرستیال، ښاغلي ډاکټر محمد حسن غیاثي د کوچني اختر په لومړۍ ورځ د مل ټیم سره په ګډه په کابل کې دشت برچي ۱۰۰ بستریز او ۵۰ بستریز روغتونونو څخه لیدنه ترسره کړه.
د روغتیايي پراختیا او پالیسۍ مرستیال، له روغتیايي کارکوونکو سره د لیدنې ترڅنګ په یادو روغتونونو کې د بستر ناروغانو احوال واخیست او له هغوی سره یې یو اندازه مالي مرسته هم وکړه.
ښاغلي مرستیال، د یادو روغتونونو بېلا بېلې څانګې له نږدې ولیدې، د روغتیايي کارکوونکو هڅې یې وستایلې او هغوی ته یې سپارښتنې وکړې، چې د اختر په شپو ورځو کې ناروغانو ته غوره خدمتونه وړاندې کړي.
د یادونې وړ ده، چې د روغتیا وزارت رهبرۍ په ځانګړي هدایت په مرکز او ټولو ولایتونو کې د اختر په شپو ورځو کې د روغتیايي مرکزونو فعال ساتلو هدایت شوی؛ ترڅو د هېوادوالو روغتیايي ستونزو ته رسېدنه ترسره او له روغتیايي خدماتو برخمن وي.
