د عامې روغتیا وزارت او ورزشي ادارو په ګډه د اعتياد مخنیوي او د روغ شوي کسانو د بیا رغونې لپاره هڅې ګړندۍ کړې
د عامې روغتیا وزارت د روږدو درملنې ۴۵۰ بستریز روغتون له لوري، د المپیک، بدني روزنې او ورزش لوی ریاست سره په همغږۍ، د نشه يي توکو پر وړاندې د مبارزې، د تداوي شويو ناروغانو د بیا روږديتوب مخنیوي او د هغوی د فزیکي حالت ښه والي په موخه غونډه ترسره شوه
په دې غونډه کې د عامې روغتیا وزارت د مقام د دفتر لوی رئیس الحاج شیخ محمد طاهر حلیم، د المپیک، بدني روزنې او ورزش لوی ریاست مسؤلینو، د روږدو درملنې ملي برنامې ریاست مسؤلینو، د ۴۵۰ بستریز روغتون امر ډاکټر عبدالقادر دانشمل، روغتیايي کارکوونکو، ورزشکارانو او د رسنیو استازو ګډون کړی و.
د عامې روغتیا وزارت د مقام د دفتر لوی رئیس د روږديتوب د مخنیوي، د عامه پوهاوي د پیاوړتیا او د تداوي شويو ناروغانو د سالم ژوند پر لور د هڅونې په برخه کې د ورته غونډو په اهميت ټينګار وکړ او ويې وویل، منظم ورزشي فعالیتونه د درملنې بهیر پیاوړی کوي او د فزیکي روغتیا تر څنګ د رواني ثبات په رامنځته کولو کې اغېزناک تمامېږي.
همداراز، د روږدو درملنې ۴۵۰ بستریز روغتون امر ډاکټر عبدالقادر دانشمل د درملنې تر څنګ د دوامدار ملاتړ پر اړتیا ټینګار وکړ او ویې ویل، روزنیز او ورزشي فعالیتونه کولای شي د تداوي شويو کسانو د بیا روږدي کېدو مخه ونیسي او هغوی بېرته عادي ژوند ته وروګرځوي.
دغه راز، د روږدو درملنې ملي برنامې او د المپیک، بدني روزنې او ورزش لوی ریاست استازو د اعتياد د مخنیوي په برخه کې د ګډو هڅو پر پیاوړتیا ټینګار وکړ او ورزش یې د سالمې ټولنې د رامنځته کولو لپاره یو اغېزمن ګام وباله.
په پای کې د المپیک، بدني روزنې او ورزش لوی ریاست په همغږۍ د روږدو درملنې د شپږو روغتیايي مرکزونو د تداوي شويو ناروغانو ترمنځ د والیبال سیالۍ ترسره شوې، چې د ګډونوالو له لېوالتیا او هڅونې سره مل وې. دغو سیالیو د مرکزونو ترمنځ د همغږۍ، د همکارۍ او مثبتې سیالۍ روحیه پیاوړې کړه او د عامې روغتیا وزارت مسؤلینو له لوري د دې ډول نوښتونو پر دوام ټینګار وشو.
