د عامې روغتیا وزارت د خوړو او درملو مرستیال، ښاغلي مولوي حمدالله زاهد او مل پلاوي مسکو کې د افغانستان ا.ا له سفیر سره لیدنه ترسره کړه

په دې لیدنه کې روسیې هېواد ته د سفر پر اساسي موخو، د یاد هېواد له لوړپوړو چارواکو سره د رسمي لیدنو پر پلان او همدارنګه، د خوړو او درملو له تولیدي شرکتونو څخه د لیدنو په اړه بحث او خبرې وشوې.

د دې سفر موخه د دواړو هېوادونو ترمنځ د اړیکو پیاوړتیا، د خوړو او درملو په سکتور کې د ستراتېژیکو همکاریو پراختیا او افغان سوداګرو ته درملو برخه کې د معیاري، خوندي او مناسب قیمت وارداتو د اسانتیاوو رامنځته کول دي.

دغه راز، د خوړو او درملو معینیت یاد پلاوي د افغانستان ا.ا له سفیر سره تر لېدنې وروسته روسیه کې (Pharmasyntez) د درمل جوړونې شرکت مسؤلینو سره هم ولیدل، چې د یاد شرکت رئیس افغان پلاوي ته د درملو د تولیدي ظرفیت، د کیفیت کنټرول  میکانیزم او صادراتي پروسو په اړه هراړخیز معلومات وړاندې کړل او دواړو لورو د باکیفیته، خوندي او مناسب قیمت درملو د صادراتو اسانتیا او د درمل جوړونې په سکتور کې د ګډې پانګونې پر فرصتونو خبرې وکړې.