د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي په مشرۍ د کابل ولایت تخصصي او ثالثي روغتونونو له مسؤلینو سره د همغږۍ غونډه ترسره شوه
په دې غونډه کې د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي د اغېزمن مدیریت پر اهمیت وینا وکړه او ویې ویل: «که مدیریت په ښه ډول ترسره شي، چارې به هم په ښه کیفیت او زیات سرعت مخ ته لاړې شي».
همدارنګه، ښاغلي مرستیال د روغتیایي کارکوونکو د معاشونو په اړه وینا تر سره او د هغوی حقوقو او معاشاتو ته په رسېدنه یې ټینګار وکړ؛ تر څو روغتیا برخه کې د کار کولو روحیه او کیفیت لوړ شي. هغه په روغتونونو کې د شته ستونزو حل او د روغتیايي خدمتونو ښه والي په موخه اړوندو مسؤلینو ته لازمې لارښوونې وکړې.
په یاده غونډه کې د عامې روغتیا وزارت د معالجوي طب لوی رئیس، ډاکتر وحدت الکوزي د درملو په کارولو کې کورنیو تولیداتو ته پر لومړیتوب ورکولو ټینګار وکړ؛ ترڅو د درملو د کیفیت په تضمین کې اسانتیا رامنځته او لاسرسی ورته آسانه شي. نوموړي د شفري نسخو په اړه هم وینا وکړه او د مخنیوي د سم مدیریت پر اړتیا او پاملرنې یې ټینګار وکړ.
