د عامې روغتیا وزارت د EPR پلاوي د نورستان له والي سره د سیلاب ځپلو روغتیايي وضعیت وڅېړه
د عامې روغتیا وزارت د بېړنیو پېښو پر وړاندې د چمتووالي او غبرګون (EPR) کمېټې ټاکل شوي پلاوي نورستان ولایت ته د سفر په ترڅ کې د دغه ولایت له والي، ښاغلي الحاج زینالعابدین عابد سره ناسته ترسره کړه
په دې ناسته کې د وروستیو سیلابونو له امله د اوښتو زیانونو، د ټپیانو د روغتیايي وضعیت، د هغوی د ښې درملنې او روغتیايي ستونزو ته د رسېدنې په اړه بحث او خبرې وشوې.
د عامې روغتیا وزارت پلاوي وویل: روغتيا وزارت د سیلاب ځپلو هېوادوالو او ټپیانو لپاره د روغتیايي خدمتونو وړاندې کولو په موخه لازم اقدامات ترسره کړي او د دوی روغتیايي اړتیاوو ته د رسېدنې بهیر به لا دوام ولري.
دغه راز، د نورستان والي د عامې روغتیا وزارت له رهبرۍ او مسؤلینو څخه د روغتیايي خدمتونو په برخه کې د همکارۍ او پاملرنې له امله مننه وکړه او د روغتیايي خدمتونو د لا پیاوړتیا غوښتنه یې وکړه.
د عامې روغتیا وزارت پلاوي ډاډ ورکړ، چې د نورستان د روغتیايي وضعیت او د ټپیانو درملنې او سیلاب ځپلو هېوادوالو ته د اړینو روغتیايي خدمتونو وړاندې کولو برخه کې به خپلو هڅو ته دوام ورکړي.
