د عامې روغتیا وزارت سرپرست د اسلامي هېوادونو د همکارۍ سازمان له ځانګړي استازي سره وکتل
پنجشنبه، کب ١٩/١٤٠٠
د عامې روغتیا وزارت سرپرست ډاکتر قلندر عباد، د خپل کار په دفتر کې د اسلامي هېوادونو له ځانګړي استازي ښاغلي طارق البخیط سره لیدنه او خبرې وکړې.
په دې لیدنه کې د افغانستان د روغتیا په برخه کې د اسلامي هېوادونو د سازمان پر همکاریو خبرې وشوې.
د عامې روغتیا وزارت سرپرست په افغانستان کې د ښاغلي البخیط حضور ته هرکلی ووایه او د معتادینو د درملنې روغتونونو، د کرونا روغتونونو، د کتلوي معافیت او نورو روغتیايي برخو کې یې د دې سازمان د لا زیاتو همکاریو غوښتنه وکړه.
ډاکتر عباد د عامې روغتیا وزارت یوه غیر سیاسي اداره وبلله او ویې ویل، چې زموږ موخه د افغانستان خلکو ته خدمت دی.
له بلې خوا د اسلامي هېوادونو د سازمان استازي ښاغلي البخيط له افغانستان سره د دغه سازمان د همکاريو پر دوام ټينګار وکړ او ويې ويل چې موږ له افغانستان سره خپلو بشري همکاريو ته دوام ورکوو.
نوموړي دغه راز وويل: چې په يادو برخو کې به د عامې روغتيا وزارت د مشرتابه وړانديزونه د دې سازمان له رييس سره شريک کړي، څو په دې برخه کې همکاري وکړي.
