د عامې روغتیا وزارت پلان او پالیسۍ لوی ریاست له لوري د پراختیايي پروژو برخه کې د لا زیاتې همغږۍ په موخه ناسته ترسره شوه
یاده ناسته د عامې روغتیا وزارت روغتیايي پراختیا او پالیسۍ مرستیال، ښاغلي ډاکټر محمد حسن غیاثي، د پلان او پالیسۍ عمومي رئیس، داکټر سید رسول منګل او د پراختیايي پروژو مسؤلینو په شتون کې ترسره شوه.
په دې ناسته کې د روغتیايي پراختیا او پالیسۍ مرستیال، د پراختیايي پروژو د لګښتونو، د پروژو برخه کې د روان ۱۴۰۳ لمریز کال له پیل تر پایه د احتمالي لګښتونو، د پروژو په اړه د تشریحاتو او د اړوندو ادارو تر منځ د لا زیاتې همغږۍ اړوند خبرې ترسره کړي.
همداراز، د عامې روغتیا وزارت د پلان او پالیسۍ لوی رئیس، ډاکټر سید رسول منګل له اړوندو مسؤلینو وغوښتل، چې خپلو مسؤلیتونو او زیاتې همغږۍ ته په پاملرنې شته بودجه د پراختیايي پروژو برخه کې په اغېزمنه توګه وکاروي او د خپلو ادارو د ارزیابۍ پایلې د پلان او پالیسۍ ریاست سره شریکې او خپل ورځني فعالیتونه د کاري پلان له مخې ترسره کړي؛ ترڅو هېوادوالو ته په معیاري توګه روغتیايي خدمات وړاندې شي.
بل لور د روغتیا په برخه کې د پراختیايي پروژو مسؤلینو د مصرف شوې بودجې په اړه د راپورونو د تشریح کولو سربېره خپلې ستونزې او وړاندیزونه د روغتیا وزارت له رهبرۍ سره شریک کړل او د دوه اړخیزې همکارۍ ډاډ یې څرګند کړ.
