د هېواد د درملتونونو د سروی او بیا ثبت عملي پروژې پرانیست غونډه تر سره شوه
د هېواد د درملتونونو د سروی او بیا ثبت عملي پروژه د عامې روغتیا وزیر ښاغلي مولوي نور جلال جلالي، د خوړو او درملو مرستیال ښاغلي مولوي حمدالله زاهد، د یاد معینیت د رئیسانو او د مرکز او ولایتونو د بېلا بېلو ادارو د استازو په شتون کې د خوړو او درملو معینیت په عمومي تالار کې په رسمي توګه پرانیستل شوه.
د عامې روغتیا وزیر، ښاغلي مولوي نور جلال جلالي د دې سترې او حیاتي پروژې د پرانیستې له کبله د خوړو او درملو معینیت او د هېواد متدین ملت ته مبارکي وویله او یاده پروژه چې موخه یې د عامه روغتیا معیارونو لوړول، د درملو د عرضې پیاوړتیا او د هېوادوالو لپاره د خوندي، اغېزمنو او باکیفیته درملو د لاسرسي تضمین دی، یو ملي، اصلاحي او بنسټیز اقدام وباله او ویې ویل: (زموږ ملت له ډېرو کلونو راهیسې له بې کیفیته درملو او غیرمعیاري خدماتو څخه کړیږي، خو د دې پروژې په تطبیق سره به ان شاءالله دغو ستونزو ته د پای ټکی کېښودل شي).
ښاغلي وزیر همداراز، د ټولنې د روغتیا په برخه کې د خوړو خوندیتوب او د درملو د اغېزمنتیا او د کیفیت اهمیت ته په اشارې زیاته کړه، ټول وارداتي شرکتونه او تولیدي فابریکې باید یواځې هغه درمل او محصولات هېواد ته وارد، تولید او بازار ته عرضه کړي، چې له لازم خوندیتوب، کیفیت او اغېزمنتیا څخه برخمن وي.
دغه راز، د عامې روغتیا وزارت د خوړو او درملو مرستیال، ښاغلي مولوي حمدالله زاهد د دې سترې ملي پروژې پرانیسته یو لویه لاسته راوړنه وبلله او ویې ویل، د دې پروژې په تطبیق سره به د هېواد په ټولو ولایتونو، ولسوالیو او کلیو کې ټول درملتونونه، د درملو عمده پلورنځي او د دودیز طب درملتونونه سروی او ثبت شي.
هغه د دې پروسې ملاتړ د هر افغان ملي وجیبه او مسؤلیت وباله او په پای کې یې له الله تعالی څخه د توفیق دعا وکړه، څو دا پروژه په بریالیتوب سره پای ته ورسېږي.
د یادونې وړ ده، چې د یادې پروژې ټولیز لګښت ۶۰ میلیونه او ۸۰۰ زره افغانۍ دی او د راتلونکو شپږو میاشتو لپاره به د تطبیق وړ وي.
چې پایله کې به یې د هېواد ټول درملتونونه سروی شي، جواز لرونکي درملتونونه به په الکترونیکي بڼه بیا ثبت شي، خپل سري درملتونونه به تشخیص شي او د اړتیا وړ سیمو کې به د نفوس له مخې نوې درملتونونو ته ځایونه ځانګړي شي.
