د عامې روغتیا وزارت څارنې او پلټنې لوی ریاست له لوري په لومړي ځل د روغتیايي معلوماتو د مدیریت او په خصوصي روغتیايي مرکزونو کې د هغې پلي کولو سیسټم (P-HMIS) معرفي شو
دا سیسټم د عامې روغتیا وزیر ښاغلي مولوي نور جلال جلالي، روغتیايي خدمتونو وړاندې کولو مرستیال ښاغلي مولوي عبدالولي حقاني، د وزارت مرکزي رییسانو او د کابل خصوصي روغتونونو د مسؤلینو په شتون کې ګډونوالو ته معرفي شو.
د عامې روغتیا وزیر، ښاغلي مولوي نور جلال جلالي په خصوصي روغتیایي مرکزونو کې د روغتیايي معلوماتو مدیریت سیسټم پرانیستل د هېواد روغتیا برخه کې یو اغېزمن ګام او لویه لاسته راوړنه وبلله او د خصوصي روغتونونو له مسؤلینو یې وغوښتل، چې یاد سیسټم په روغتونونو کې پلي کړي.
د عامې روغتیا وزیر همداراز، د خصوصي روغتیايي سکټور له فعالیتونو مننه وکړه او دا سکټور یې د روغتیا وزارت یو پیاوړې برخه یاده کړه.
ښاغلي وزیر زیاته کړه، موږ هڅه کوو موجوده تشې ډکې کړو او د کره روغتیايي معلوماتو راټولولو پر بنسټ د خصوصي او امارتي سکټورونو لپاره د اوږدمهاله کړنلارو او پلانونو په جوړولو کې اړینې پرېکړې وکړو.
د یادې ناستې په دوام د روغتیايي خدمتونو وړاندې کولو مرستیال، ښاغلي مولوي عبدالولي حقاني د روغتیايي معلوماتو مدیریت سیسټم چمتو کولو کې د برخه اخیستونکو کسانو مننه وکړه او ویې ویل: د خصوصي روغتیایي سکټور فعالیتونه د ستایلو دي او موږ هڅه کوو، چې د روغتیايي معلوماتو مدیریت سیسټم د دې سکټور سره په همغږۍ پلی کړو؛ ترڅو وکولای شو پر ټاکلي وخت د روغتیا برخې کره معلومات راټول او له مخې یې راتلونکي پلانونه جوړ او اړینې پرېکړې وکړو.
دغه راز، د څارنې او پلټنې لوی رییس، ډاکټر عنایت الله عنایت د روغتیايي معلوماتو مدیریت سیسټم د روغتیايي خدمتونو د کیفیت ښه کولو، لنډمهاله او اوږدمهاله پلانونو جوړولو، ناروغیو مخنیوي او د خلکو د هوساینې لپاره اغېزمن وباله او په خصوصي روغتیايي مرکزونو کې یې د هغې پلي کول ضروري یاد کړل.
