د عامې روغتیا وزیر بادغیس ته د سفر پرمهال دې ولایت کې له روغتیايي کارکوونکو، د خصوصي سکټور، تطبیق کوونکې مؤسسې مسئولینو او قومي مشرانو سره ګډه ناسته ترسره کړه
د ا.ا.ا د عامې روغتیا وزیر، ښاغلي مولوي نور جلال جلالي بادغیس ته د سفر پرمهال دې ولایت کې له روغتیايي کارکوونکو، د خصوصي سکټور، تطبیق کوونکې مؤسسې مسئولینو او قومي مشرانو سره ګډه ناسته ترسره کړه
په دې ناسته کې د عامې روغتیا وزیر، د بادغيس والي حافظ محمد امین جان عمري، د ياد ولایت د عامې روغتیا رئيس مولوي خان محمد همت، د روغتیا وزارت مرکزي رئيسانو، د خصوصي سکټور، تطبیق کوونکې مؤسسې مسئولینو او قومي مشرانو ګډون کړی و.
د یاد ولایت روغتیايي مسئولینو، د عامې روغتیا له وزیر سره د دغه ولایت روغتیايي برخه کې شته ستونزې، وړاندیزونه او غوښتنې چې په کې د نويو روغتونونو جوړول، د کارکوونکو زیاتوالی، د اکمال تخصص برنامې پیل او نور شامل وو، شریک کړل.
د عامې روغتیا وزیر، د روغتیايي مسؤلینو ستونزې او وړاندیزونه واورېدل او ویې وویل: پخوا دې ولایت کې روغتیايي برخه د مسئولینو له لورې له پامه غورځول شوې وه، چې له دې وروسته به ورته ځانګړې پاملرنه کېږي.
ښاغلي وزیر دغه راز ژمنه وکړه، چې شریکو شویو ستونزو ته به د حل لار پیدا کړي؛ تر څو د یاد ولایت اوسېدونکې روغتیايي خدمتونو ته لاس پیدا او نورو ځایونو ته د درملنې په موخه له تګ خلاص شي.
