د نورستان ولایت نورګرام ولسوالۍ روغتیايي مرکز ته ۱۹۹ قلمه پرمختللي طبي تجهیزات ورکړل شول
د ملګرو ملتونو د کډوالو عالي کمېشنرۍ (UNHCR) له لوري د نورستان ولایت نورګرام ولسوالۍ روغتیايي مرکز سره د ۱۹۹ قلمه پرمختللو طبي تجهیزاتو مرسته وشوه.
په دغو تجهیزاتو کې د بېهوښۍ (انستیزۍ) او الټراساونډ دستګاوو ترڅنګ، یو شمېر نور مهم طبي وسایل او کوچني طبي تجهیزات شامل دي، چې د روغتیايي خدمتونو وړاندې کولو برخه کې به ترې ګټه واخیستل شي.
د یادو تجهیزاتو په برابرېدو سره به د نورګرام ولسوالۍ په روغتیايي مرکز کې د روغتیايي خدمتونو وړاندې کولو ظرفیت لوړ او د دې ولسوالۍ اوسېدونکو ته به د لا غوره او معیاري روغتیايي خدمتونو وړاندې کولو زمینه برابره شي.
