عامې روغتيا وزارت له لوري د بدخشان ولایتي روغتون ظرفیت له ۱۲۰ بسترونو څخه ۲۵۰ بسترونو ته لوړ شو
د بدخشان د عامې روغتيا مرستيال، نذير احمد نذر وويل، د دې روغتون په پراخېدو سره موږ کولای شو ګڼې تخصصي برخې فعالې کړو، چې په کې د غوږ، پوزې او ستوني، سترګو، ارتوپیدي، جلدي، د اعصابو جراحي، د سوځېدنې او رواني روغتیا څانګې شاملې دي.
همداراز، د ولایتي روغتون رئيس، ډاکټر شفيق همدرد وويل، چې د ظرفیت له لوړولو وړاندې ياد روغتون له جدي ستونزو سره مخ و او د بسترونو د کموالي له امله به ځینې ناروغان د تخصصي درملنې لپاره نورو ولایتونو، په ځانګړي ډول کندز ولايت ته استول کېدل، چې اوس به دا ستونزه حل او ناروغانو ته به ګڼې اسانتیاوې رامنځته شي.
دغه راز، د بدخشان اوسېدونکو د روغتون له ظرفیت لوړولو هرکلی وکړ او هیله یې وښوده، چې له دې سره به د روغتیايي خدمتونو کیفیت لا ښه شي.
د یادونې وړ ده، چې د بدخشان ولایتي روغتون د ياد ولايت په کچه یوازینی مجهز روغتون دی، چې هره ورځ ورته سلګونه ناروغان، په ځانګړي ډول له لرې پرتو ولسوالیو مراجعه کوي او اړين روغتيايي خدمتونه ورته وړاندې کېږي.
