ښاغلي مولوي عبدالولي حقاني د کوچني اختر په مناسبت کابل کې روغتیايي مرکزونه وکتل او ناروغانو سره یې مالي مرسته تر سره کړه
د ا.ا.ا د عامې روغتیا وزارت روغتیايي خدمتونو وړاندې کولو مرستیال، ښاغلي مولوي عبدالولي حقاني د کوچني اختر په مناسبت د یو شمېر مرکزي رییسانو په ملتیا په کابل کې د صدري ابن سینا، افغان اندونیزیا او احمد شاه بابا مېنې له روغتیايي مرکز څخه لیدنه ترسره کړه.
د روغتیايي خدمتونو وړاندې کولو مرستیال، له روغتیايي کارکوونکو سره د لیدنې ترڅنګ د بستر ناروغانو احوال واخیست او د ناروغانو سره یې یو اندازه مالي مرسته هم وکړه.
ښاغلي مرستیال، د یادو روغتونونو بېلا بېلې څانګې له نږدې ولیدې، د روغتیايي کارکوونکو هڅې یې وستایلې او هغوی ته یې سپارښتنې وکړې، چې د اختر په شپو ورځو کې ناروغانو ته غوره خدمات وړاندې کړي.
د یادونې وړ ده، چې د روغتیا وزارت رهبرۍ په ځانګړي هدایت په مرکز او ټولو ولایتونو کې د اختر په شپو ورځو کې د روغتیايي مرکزونو فعال ساتلو هدایت شوی؛ ترڅو ناروغ هېوادوال ستونزو ته رسېدنه ترسره او له روغتیايي خدماتو برخمن وي.
