ښاغلی مولوي حمدالله زاهد د یوې غونډې په ترڅ کې د عامې روغتیا وزارت د خوړو او درملو معینیت د نوي مرستیال په توګه وټاکل شو
په همدې موخه جوړه شوې غونډه کې د افغانستان اسلامي امارت د چارو ادارې لوی رئیس ښاغلي شیخ الحدیث مولوي انورالحق انور، د عامې روغتیا وزیر ښاغلي مولوي نور جلال جلالي، د وزارت مرستیالانو، مرکزي رئیسانو او د بېلا بېلو امارتي ادارو استازو کډون کړی و.
د چارو ادارې لوی رئیس، ښاغلي شیخ الحدیث انورالحق انور تغیر او تبدیل او د اوامرو څخه اطاعت کول د نظام اصل یاد کړ او ویې ویل: ( د عالیقدر امیرالمؤمنین حفظه الله د حکم پر اساس، ښاغلی مولوي حمدالله زاهد د عامې روغتیا وزارت د خوړو او درملو معینیت د مرستیال په توګه وټاکل شو؛ څو له دې وروسته د یادې برخې چارې پر مخ یوسي.)
د چارو ادارې لوی رئیس د عامې روغتیا وزارت د خوړو او درملو معینیت نوي مرستیال، ښاغلي مولوي حمدالله زاهد او د یاد معینیت مخکیني مرستیال، ښاغلي ډاکټر عبدالباري عمر ته په چارو کې د بریالیتوب هیله څرګنده کړه او په اړوندو برخو کې ترې هېوادوالو ته د خدمت غوښتونکی شو.
د دغه غونډې په ترڅ کې د عامې روغتیا وزیر، ښاغلي مولوي نور جلال جلالي وویل، د شکر ځای دی، چې په ټول هېواد کې یو اسلامي نظام حاکم دی او ټول د یو امیر د اوامرو اطاعت کوي، چې په همدې موخه د عالیقدر امیرالمؤمنین حفظه الله د حکم له مخې ښاغلی مولوي حمدالله زاهد د عامې روغتیا وزارت د خوړو او درملو معینیت لپاره د نوي مرستیال په توګه وټاکل شو او په چارو کې ورته د بریالیتوب غوښتونکي یم.
همداراز د عامې روغتیا وزارت د خوړو او درملو نوي ټاکل شوي مرستیال، مولوي حمدالله زاهد د خپلو کاري برنامو په اړه ګډونوالو ته معلومات وړاندې کړل او ویې ویل، موږ د امیرالمؤمنین حفظه الله د اوامرو څخه په اطاعت هڅه کوو، څو د اسلامي نظام د اصولو او قوانینو له مخې خپلو هېوادوالو ته د خدمت مصدر وګرځو.
