د وزیر محمد اکبر خان په تخصصي روغتون کې د درې سوه زره امریکايي ډالرو په لګښت د ۲۰۰ کیلوواټه لمریزې برېښنا سیستم نصب او د یوې غونډې په ترڅ کې پرانیستل شو
د دغه لمریزې برېښنا سیستم د پرانیستې په مراسمو کې د عامې روغتیا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني، د وزیر محمد اکبر خان روغتون رئیس ډاکټر عنایت الله عنایت، په افغانستان کې د ملګرو ملتونو د پراختیايي پروګرام د دفتر مسؤل ښاغلي ترهان صالح، په افغانستان کې د اروپايي ټولنې استازې مېرمن ویرونیکا باسکویچ او د آسیا پراختیايي بانک استازي ګډون کړی و.
د روغتیايي خدمتونو وړاندې کولو مرستیال، د ملګرو ملتونو د پراختیايي پروګرام او د عامې روغتیا وزارت له نورو روغتیايي شریکانو څخه د همکارۍ له امله د مننې ترڅنګ په وزیر محمد اکبر خان روغتون کې د لمریزې برېښنا سیستم نصب د برېښنا د کمښت ستونزې حل، د روغتیايي خدمتونو کیفیت ښه والي، د اکسیجن سیستم پیاوړتیا، د ناروغانو د ژوند ژغورنې او د چاپېریال د ککړتیا مخنیوي په برخه کې اغېزمن ګام وباله او د دغه روغتون له مسؤلینو یې وغوښتل، چې د یاد سیستم د ساتنې، پالنې او سمې ګټې اخیستنې په برخه کې لا ډېرې هڅې وکړي.
د یادونې وړ ده، چې د لمریزې برېښنا یاد سیستم په افغانستان کې د ملګرو ملتونو د پراختیايي پروګرام په مالي او تخنیکي همکارۍ د درې سوه زره امریکايي ډالرو په لګښت د درې نیمو میاشتو په موده کې بشپړ او نن د یوې غونډې په ترڅ کې پرانیستل شو.
