د لوګر او میدان وردګو ولایتونو د روغتیايي کارکوونکو د ظرفیت لوړولو په موخه دوه روزنیز پروګرامونه ترسره شول
د عامې روغتیا وزارت د غیرساري ناروغیو د مخنیوي او کنټرول ډیپارټمنټ له لوري د لوګر او میدان وردګو ولایتونو د روغتیايي کارکوونکو د ظرفیت لوړولو په موخه، د ډاکټرانو لپاره څلور ورځني او د قابلو لپاره درې ورځني روزنیز پروګرامونه ترسره شول. په دغو روزنیزو پروګرامونو کې د کلینیکونو او روغتونونو ۲۵ ډاکټرانو او ۲۵ قابلو ګډون کړی و. ګډونوالو ته د غیرساري ناروغیو د مخنیوي او کنټرول، لومړني تشخیص، درملنې، روغتونونو ته د ناروغانو راجع کولو، د غیرساري ناروغیو د ناروغانو مدیریت او روغتیايي مشورو په برخو کې روزنه ورکړل شوه.
د عامې روغتیا وزارت د غیرساري ناروغیو د مخنیوي او کنټرول مسؤل، ډاکټر محمد سمیع کریمي د غیرساري ناروغیو په مخنیوي او کنټرول کې د ډاکټرانو او ټولنیزو روغتیايي کارکوونکو رول اغېزناک وباله او زیاته یې کړه: «له ګډونوالو غواړو چې خپل ترلاسه کړې پوهه او تجربې له خپلو نورو همکارانو سره په کلینیکونو او روغتونونو کې شریکې کړي؛ ترڅو په دې برخه کې د لا ډېرو روغتیايي کارکوونکو ظرفیت لوړ شي.»
