په ۲۰۲۴ زیږدیز کال کې په افغانستان کې د پولیو (ګوزڼ) هېڅ مثبته پېښه نده ثبت شوې
د افغانستان اسلامي امارت د عامې روغتیا وزیر، ښاغلي ډاکټر قلندر عباد نن یکشنبه د رجب المرجب میاشتې ۱۶مه نېټه د یو خبرې کنفرانس په ترڅ کې د پاکستان هېواد د «ان آی اچ» ادارې له لوري په کونړ ولایت کې د یوې لس کلنې ماشومې د پولیو (ګوزن) ناروغۍ د اخته کېدو په تړاو خپور شوی خبر رد او په دې اړه خپرې شوې ویناوې یې بې بنسټه او غیر مسئولانه وګڼلې.
د عامې روغتیا وزیر، ښاغلي ډاکټر قلندر عباد وویل، د عامې روغتیا وزارت د څېړنو پر بنسټ دغه ماشومه په نیورولوژي (یو ډول مغزي ناروغي ده) اخته ده، د وجود یوه برخه یې فعالیت نه لري او د پولیو هېڅ ډول نښې نښانې یې په وجود کې شتون نه لري.
د عامې روغتیا وزیر، ښاغلي ډاکټر قلندر عباد په دې اړه خپور شوی خبر له حقیقت لېرې وګاڼه او و یې ویل چې د دې ماشومې په اړه د یادې ادارې ویناوې غیر مسئولانه دي.
ښاغلي وزیر زیاته کړه، چې د افغانستان اسلامي امارت په هېواد کې د پولیو له منځه وړلو ته ژمن دی او په تېرو دوو کلونو کې د عامې روغتیا وزارت په دې برخه کې ډېرې لاسته راوړنې لرلې دي.
ښاغلي وزیر همداراز په افغانستان کې د پولیو د تشخیص د لابراتوار د جوړېدو په اړه معلومات وړاندې کړل او و یې ویل، چې د لومړي ځل لپاره په افغانستان کې د پولیو د تشخیص لابراتوار جوړ او په نیږدې کې به یې پرانیسته ترسره شي او وروسته له دې به د پولیو پېښې په کور دننه تشخیص شي.
