په میدان وردګ ولایت کې د ۱.۵ میلیونه ډالرو په ارزښت د یوه روغتون ودانۍ جوړه شوه
د میدان وردګ ولایت سیداباد ولسوالۍ په اونخي سیمه کې د یوه افغان ، جمال الدین خان کورنۍ لخوا د ۱.۵ میلیونه ډالرو په ارزښت د یوه روغتون ودانۍ جوړه او د عامې روغتیا ریاست ته وسپارل شوه.
په همدې موخه جوړو شوو مراسمو کې چې د میدان وردګ ولایت د عامې روغتیا رئیس ډاکټر ځیرک ، د جمال الدین خان د کورنۍ غړو، او د سیمې اوسیدونکو ګډون درلود د یاد روغتون ودانۍ پرانسته تر سره کړه!
یاد روغتون چې د شهید سراج جمال په نوم نومول شوی د سیمې په کچه خورا عصري او په بیلابیلو طبی وسایلو سمبال روغتون دی چې د سیمې د اوسیدونکو لپاره به خورا اسانتیاوې رامنځته کړي.
د عامې روغتیا وزارت د یاد روغتون جوړوونکو د مالي ملاتړ څخه مننه او د همکارۍ قدردانی کوي.
د هیواد هر ملي تجار او سرمایه ګزار کولای شي چې په پوره شفافیت او اسانۍ سره د خپلو ولسونو لپاره د عامې روغتیا وزارت سره په ګډه دا ډول عام المنفعه پروژې تر سره کړي.
