د بیزو تڼاکې (مانکي پاکس) ناروغۍ د کنټرول او مخنیوي په موخه غونډه تر سره شوه
د عامې روغتیا وزیر، ښاغلي مولوي نور جلال جلالي د ساري ناروغیو په ځانګړي توګه د بیزو تڼاکې (مانکي پاکس) ناروغۍ د کنټرول او مخنیوي په موخه د وزارت د مالي او اداري چارو، روغتیايي خدمتونو وړاندې کولو او روغتیايي پراختیا او پالیسۍ له مرستیالانو او مرکزي رئیسانو سره د یوې ناستې په ترڅ کې وکتل
د عامې روغتیا وزیر، ښاغلي مولوي نور جلال جلالي په دې ناسته کې د اړوندو ریاستونو مسؤلینو ته سپارښتنه وکړه؛ څو د غوره همغږۍ او په کور دننه د ټولو شته امکاناتو په ګټې اخیستنې سره د ساري ناروغیو په ځانګړي ډول د بیزو تڼاکې (مانکي پاکس) ناروغۍ د کنټرول او مخنیوي په موخه لازم اقدامات ترسره کړي.
سربېره پر دې د عامې روغتیا وزیر، اړوندو مسؤلینو ته سپارښتنه وکړه، چې په مرکز کابل او ولایتونو کې روغتونونو او روغتیايي مرکزونو ته د درملو رسولو په برخه کې ګړندۍ هڅې وکړي؛ ترڅو په سمه توګه د ناروغانو روغتیايي ستونزو ته رسېدنه ترسره او غوره درملنه یې وشي.
له بل لوري د وزارت مرکزي رئیسانو په هېواد کې د بیزو تڼاکې (مانکي پاکس) او ورته نورو ساري ناروغیو د کنټرول او مخنیوي په برخه کې د وزارت رهبرۍ ته د لازمو تدابیرو نیولو او د اړوندو ادارو تر منځ د غوره همغږۍ ډاډ ورکړ.
