د عامې روغتیا وزارت د اکمال تخصص ریاست له لوري د مرکز کابل په تخصصي روغتونونو کې د تخصصي برنامې د پیل په اړه!
د عامې روغتیا وزارت د اکمال تخصص لوی ریاست په پام کې لري، چې د افغانستان د خلکو روغتیايي اړتیاوو او ستونزو د حل په موخه په تخصصي روغتونونو کې هغه تخصصي څانګې چې تر اوسه شتون نه لري رامنځته کړي.
په همدې موخه د پلمونولوژي، انکالوژي، کارډیولوژي، ګستروانټرولوژي، زړه جراحي، نفرولوژي، همیټولوژي او جدي پاملرنې څانګو له لوري د اکمال تخصص برنامې د استادانو، معالجوي طب عمومي ریاست او د بشري سرچینو عمومي ریاست د استازو په شتون کې یوه ناسته ترسره او پرېکړه وشوه، چې په روغتونونو کې د ټولو نویو تخصصي څانګو د جوړېدو په موخه دې تشکیل، ځانګړی نصاب، تجهیزات او مناسب ځای په اړه طرحې چمتو او د اکمال تخصص ریاست سره شریکې کړي.
د یادونې وړ ده، چې د اکمال تخصص لوی ریاست تل هڅه کړې د تخصصي برنامو د بډایه کولو لپاره علمي معیارونه پلي او د ډاکټرانو علمي کچه لوړه کړي؛ ترڅو هېوادوالو ته په کور دننه معیاري خدمات وړاندې شي.
