د عامې روغتیا وزارت د خوړو او درملو مرستیال، ښاغلي مولوي حمدالله زاهد د هېواد د درملو د اتحادیې له مسؤلینو او غړو سره ناسته ترسره کړه
په دې ناسته کې د ا.ا.ا د ریاستالوزرا اقتصادي معاونیت د فرمان تطبیق او له پاکستان څخه د درملو وارداتو د بندېدو په اړه بحث ترسره او نظرونه شریک شول.
د خوړو او درملو مرستیال، ښاغلي مولوي حمدالله زاهد د درملو اتحادیې له ملاتړ څخه مننه وکړه او د بدیلو لارو موندلو لپاره یې د یو مناسب میکانیزم په رامنځته کولو، د سوداګرو د اندېښنو پر حل، د شرکتونو د ثبت او د درملو د بدیلو وارداتو برخه کې یې پر لازمو اسانتیاوو رامنځته کېدو ټینګار وکړ.
همدارنګه، ښاغلي له سوداګرو څخه وغوښتل، چې له احتکار څخه ډډه وکړي او د بیو په کنټرول کې له وزارت سره همکاري وکړي؛ څو اړمن هېوادوال زیانمن نه شي.
بل لور، د درملو د اتحادیې مسؤلینو او غړو د عامې روغتیا وزارت له دوامدارو همکاریو څخه مننه وکړه او د ا.ا.ا د پرېکړې څخه یې بشپړ ملاتړ اعلان کړ او هم یې له نورو هېوادونو څخه د درملو د بدیلو وارداتو په اړه خپل وړاندیزونه وړاندې کړل.
د یادونې وړ ده، چې اوسمهال په هېواد کې د درملو تولیدي فابریکې له ۶۵۰ ډوله درملو څخه زیات درمل تولیدوي او دا تولیدات د پراختیا په حال کې دي او هم یې د لا پراختیا او پیاوړتیا لپاره اغېزمن اقدامات دوام لري.
