د افغانستان اسلامي امارت د عامې روغتیا وزیر، ښاغلي مولوي نورجلال جلالي په خپل کاري دفتر کې د افغانستان لپاره د ترکیې هېواد له شارژدافیر ښاغلي سادین ایلد سره ولیدل
په دې لیدنه کې د عامې روغتیا وزیر ښاغلي مولوي نور جلال جلالي له افغانستان سره د ترکیې هېواد د روغتیايي همکاریو مننه وکړه او و یې ویل: «د افغان روغتیايي کارکوونکو روزنه، د زړه ولادي نقیصه لرونکو ماشومانو درملنې ته د روغتیایي امکاناتو زیاتوالی، د ولسوالیو په کچه د عمومي روغتونونو جوړیدنې او ورته د اړینو تجهیزاتو برابرولو، په مرکز کابل کې د کوچنیانو د عصبي جراحي خدماتو پیل او پیاوړتیا هغه مهمې برخې دي، چې د ترکیې هېواد همکارۍ ته اړتیا لري.»
نوموړي همدارنګه زیاته کړه چې د ترکیې هېواد درمل د افغانستان لپاره ګټور دي، خو ټینګار یې وکړ چې کیفیت او مناسب قیمت باید په پام کې ونیول شي.
بل لور ته د ترکیې هیواد شارژدافیر ډاډ ورکړ، چې هېواد به یې د افغانستان د روغتیا سکتور سره خپلو همکاریو ته دوام ورکړي او هڅه کوي، چې د عامې روغتیا وزارت د اړتیاوو له مخې لازم تجهیزات او امکانات برابر کړي، هغه له وزارت څخه وغوښتل چې د اړتیا وړ تجهیزاتو او امکاناتو لېست ورسره شریک کړي، څو په دې برخه کې عملي همکاري نوره هم پراخه شي.
