د عامې روغتیا وزارت د مرکزي تخصصي او ثالثي روغتونونو له رئیسانو سره د لا زیاتې همغږۍ، د روغتیايي خدمتونو ښه والي او شته ستونزو حل په موخه میاشتنۍ غونډه ترسره شوه
دا غونډه د عامې روغتیا وزارت د معالجوي طب لوی رئیس، ډاکټر وحدت الکوزي په مشرۍ تر سره شوه، چې د وزارت مرکزي رئیسانو، د تخصصي او ثالثي روغتونونو رئیسانو، سرطبیبانو، او د يادو روغتونونو د تدارکاتو او مالي چارو مسؤلینو په کې ګډون کړی و.
په دې غونډه کې د مالي او تدارکاتي چارو، لا زیاتې همغږۍ او په روغتونونو کې د شته ستونزو د حل اړوند بحث او خبرې وشوې، چې ګډونوالو د روغتونونو لپاره د ځانګړې شوې بودجې، تدارکاتي پروسو او شته ستونزو په اړه خبرې تر سره او له اړوندو مسؤلینو یې د دغو ستونزو د حل غوښتنه وکړه.
د عامې روغتیا وزارت د معالجوي طب لوی رئیس، ډاکټر وحدت الکوزي، د تدارکاتو رئیس استاد محمد زبیر غالب او د مالي او حسابي ریاست استازو د روغتونونو د مسؤلینو وړاندیزونه او ستونزې واورېدې او د خدمتونو د لا ښه والي، د همغږۍ پیاوړتیا او د شته ستونزو حل په موخه یې اړوندو مسؤلینو ته لازمې سپارښتنې وکړې.
