د ا.ا.ا د عامې روغتيا وزير، ښاغلي مولوي نور جلال جلالي او مل پلاوي کندهار ولايت ته د خپل سفر په ترڅ کې د معروف ولسوالۍ له قومي مخورو او مشرانو سره لیدنه وکړه
په دې لیدنه کې د معروف ولسوالۍ قومي مخورو ښاغلي وزير ته ښه راغلاست ووايه، او د روغتيا برخه کې يې يو شمېر غوښتنې او وړانديزونه شريک کړل او د عامې روغتيا وزارت له رهبرۍ څخه يې وغوښتل، چې د دغه ولسوالۍ اوسېدونکو ته لازمې روغتيايي اسانتياوې برابرې کړي.
د عامې روغتيا وزير، د معروف ولسوالۍ قومي مخورو او مشرانو غوښتنې او وړانديزونه واورېدل، د دوی غوښتنو ته د رسېدنې ډاډ یې څرګند او ويې وويل: (لرې پرتو سیمو ته د روغتيايي خدمتونو رسول د عامې روغتيا وزارت له لومړيتوبونو څخه دي او په نږدې راتلونکي کې به معروف ولسوالۍ کې هم د ولسوالۍ کچې جوړېدونکي روغتون چارې بشپړې او ګټې اخيستنې ته به وسپارل شي).
ښاغلي وزير زياته کړه، د دې روغتون په جوړېدو سره به د روغتيايي خدمتونو کچه لوړه او د يادې ولسوالۍ اوسېدونکو لپاره به د روغتيا برخه کې لازمې اسانتياوې برابرې شي.
