د ا.ا.ا د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ننګرهار ته د سفر په ترڅ کې په تورخم کې د بېرته راستنېدونکو هېوادوالو لپاره له ځانګړي شوي عمري کمپ څخه لیدنه وکړه
په دې لیدنه کې د روغتیايي خدمتونو وړاندې کولو مرستیال، د عمري کمپ روغتیايي مرکزونو او د بېرته راستنېدونکو لپاره د بېړني شل بستریز روغتون د خدمتونو بهیر له نږدې ولید او روغتیايي کارکوونکو ته یې سپارښتنې وکړې، چې بېرته راستنېدونکو هېوادوالو سره د ښه چلند سربېره هغوی ته معیاري روغتیايي خدمتونه وړاندې کړي.
ښاغلي مرستیال همداراز، د عمري کمپ د روغتیايي مرکزونو او بېړني شل بستریز روغتون موجوده ستونزې او اړتیاوې په نښه او د حل په موخه يې له اړوندو مسؤلینو سره شریکې کړې، هغه د ننګرهار د عامې روغتیا ریاست مسؤلینو ته هم سپارښتنه وکړه، چې د زلزله ځپلو هېوادوالو روغتیايي ستونزو ته د رسېدنې تر څنګ بېرته راستنېدونکو ته هم جدي پاملرنه وکړي.
