د ا.ا.ا د عامې روغتیا وزیر، ښاغلي مولوي نور جلال جلالي ننګرهار ولایت ته د سفر په ترڅ کې د ختیځ روغتیايي کمپلکس له رغنیزو چارو او د روږدو درملنې ۱۷۰ بستریز روغتون څخه لیدنه وکړه
په دې لیدنه کې چې د ننګرهار د عامې روغتیا رئیس مولوي امین الله شریف او یو شمېر نورو مسؤلینو یې هم ملتیا کوله، د عامې روغتیا وزیر وویل: د ساختمان برخې مسؤلینو ته لارښوونه شوې، چې د ختیځ کمپلکس د چارو چټکتیا په موخه هڅې لا ګړندۍ کړي او زیاته یې کړه، دغه کمپلکس د ختیځ ولسونو لپاره ځانګړی ارزښت لري، چې ژر به یې چارې بشپړې او د ناروغانو په درملنه کې به ځانګړی رول ادا کړي.
دغه راز، ښاغلي د روږدو درملنې ۱۷۰ بستریز روغتون کې په ترسره شویو رغنیزو چارو خوښي څرګنده او مسؤلینو ته یې د لا غوره خدمتونو وړاندې کولو په موخه لازمې سپارښتنې وکړې.
