د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د (UNDP) سازمان له مشر، ښاغلي سټیفن روډرېک سره لیدنه تر سره کړه

په دې لیدنه کې د روغتیايي مرکزونو لپاره د لمریزې برېښنا سیسټم پر جوړولو او د دې پروسې پر لا ادامې ، د محیطي روغتیا برنامو پر پېل او غښتلتیا ، د طبي زباله جاتو پر مدیریت ، د محیطي روغتیا اړوند ټرینرانو او روغتیایي کارکوونکو د ظرفیت لوړونې او روزنې ، د ملاریا، توبرکلوز او اېچ آی وي ناروغیو د مخنیوي او د دې ناروغیو د مخنیوي اړوند څانګو پر هر اړخیز ملاتړ بحث او خبرې تر سره شوې.

د عامې روغتیا وزیر، ښاغلي مولوي نور جلال جلالي د یاد سازمان له همکارۍ څخه په مننې د محیطي روغتیا برنامو پر پېل او غښتلتیا ، د طبي زباله جاتو پر مدیریت ، د راډیولوژیکي خطرونو څخه د کارکوونکو ساتنې ، د محیطي روغتیا اړوند ټرینرانو او روغتیایي کارکوونکو د ظرفیت لوړونې او روزنې ، د اړمنو سیمو او روغتیايي مرکزونو لپاره د لمریزې برېښنا سیسټم جوړولو،  او د ساري ناروغیو په کنټرول کې د یو این ډي پي همکاري او همغږي اړینه وګڼله.

دغه راز، د یو این ډي پي سازمان مشر او مل پلاوي د ذکر شویو برنامو پر دوامدار ملاتړ ژمنه وکړه او په وینا یې هڅه یې دا ده چې د افغانستان روغتیایي سیستم سره به په دوامداره توګه همکار اوسي.