د ا.ا.ا. روغتیايي اتشې، متخصص دوکتور فضلالله سیرت، د ترکیې د روغتیا وزارت د اروپایي ټولنې او بهرنیو اړیکو له لوی رئیس، ډاکټر عزیز البر بیتن سره لیدنه وکړه
په دې لیدنه کې د روغتیا وزارت د افریقا او منځني ختیځ رئیس، ډاکټر جمال ارهون اجمیش او د اروپایي ټولنې کارپوه، ښاغلی ایشک خان کایا هم ګډون درلود.
دوکتور سیرت د ناستې په پیل کې د افغانستان د خلکو په استازیتوب د ترکیې له مرستو او همکاریو څخه، په ځانګړې توګه د بېړنیو حالاتو لکه زلزلو پر مهال، مننه او قدرداني وکړه او دغه همکارۍ یې د دواړو هېوادونو د ورورګلوۍ او تاریخي اړیکو څرګندونه وبلله.
د لیدنې پر مهال، دواړو لورو د روغتیايي همکاریو پر پیاوړتیا، د افغان ډاکټرانو او روغتیايي کارکوونکو د روزنې، د عامې روغتیا د پوهاوي پروګرامونو او د روغتونونو او لابراتوارونو د تجهیز پر موضوعاتو بحث او هوکړه وکړه.
همدارنګه پرېکړه وشوه، چې د موجوده پروتوکول پر بنسټ، هر کال ۲۵۰ افغان ناروغان – چې درملنه یې په هېواد کې ناشونې وي – د ترکیې په روغتونونو کې وړیا تداوي شي.
د ترکیې د روغتیا وزارت استازو څرګنده کړه، چې د دوی روغتیايي نظام په چټک پرمختګ روان دی او بشپړ چمتو والی لري، چې د افغانستان روغتیا وزارت سره خپلې بریالۍ تجربې شریکي کړي.
