د افغانستان ا.ا. د عامې روغتیا وزارت د خوړو او درملو معینیت پلاوي بنګله دېش هېواد ته د رسمي سفر په ترڅ کې د سکویر (SQUARE) روغتون له مسؤلینو سره ناسته ترسره کړه
دا ناسته د روغتیايي همکاریو پیاوړتیا، د مسلکي تجربو د تبادلې او د روغتیايي سکتور برخه کې د ګډو همکاریو د فرصتونو ارزونې په موخه تر سره شوه، چې په کې د خوړو او درملو معینیت د درملو او روغتیايي محصولاتو د تنظیم لوی رئیس الحافظ ډاکټر نعیمالله ایوبي، مل پلاوي او په بنګلهدېش کې د افغانستان د سفارت چارسمبالي ښاغلي ویس خان ګډون کړی و.
د دې ناستې په ترڅ کې دواړو لورو د نظارتي سیستمونو ښه والي، د افغان روغتیايي کارکوونکو د ظرفیت لوړولو، د افغانستان روغتیايي سیستم د پیاوړتیا لپاره د پرمختللو روغتونونو له بریالیو تجربو څخه د ګټې اخیستنې پر اهمیت او د دواړو هېوادونو ترمنځ د تخنیکي همکاریو پر پراختیا بحث او خبرې تر سره کړې.
د ناستې په پای کې د خوړو او درملو معینیت پلاوي د سکویر روغتون د مسؤلینو له همکارۍ او تود هرکلي څخه مننه وکړه او په راتلونکي کې یې د رغنده همکاریو پر دوام ټینګار وکړ.
